Остеолекс раствор 5 мг/ 100 мл

Бір мл препараттың құрамында: Белсенді зат – 0.0533 мг золедрон қышқылы моногидраты (0.05 мг золедрон қышқылына шаққанда) қосымша заттар: натрий цитраты, маннитол, инъекцияға арналған су. Сыртқы түрінің, иісінің, дәмінің сипаттамасы Мөлдір түссіз ерітінді

• остеопорозды емдеуде • әйелдерде постменопауза кезеңінде • ересек еркектерде сыну қаупі жоғарылағанда, ортан жілік сүйегінің проксимальді бөлігінің сынуы таяуда болған пациенттерді қоса • глюкокортикостероидтармен ұзақ жүйелі емдеумен байланысты остеопорозды емдеуде • әйелдерде постменопауза кезеңінде • ересек еркектерде сыну қаупі жоғарылағанда • ересектерде сүйектің Педжет ауруын емдеуде

Әсер ету механизмі. Золедрон қышқылы құрамында азот бар бисфосфонаттар класына жатады және негізінен сүйектерге әсер етеді. Ол остеокластар арқылы сүйек тіні резорбциясының тежегіші болып табылады. Биcфосфонаттардың селективті әсері минералданған сүйек тініне ұқсастығының жоғарылығына негізделген. Золедрон қышқылының остеокласттағы негізгі молекулалық нысанасы фарнезилпирофосфат-синтетаза ферменті болып табылады. Золедрон қышқылының ұзақ әсер етуі фарнезилпирофосфат-синтетазаның белсенді орталығымен байланысу дәрежесінің жоғарылығынан және минералданған сүйек тінімен тектестігінен айқындалады. Золедрон қышқылын қолдану аясында сүйектің алмасу көрсеткіштерінің менопаузадан кейін жоғарылаған мәндерінен жол берілетін ең төменгі деңгейіне дейін жылдам төмендеуі байқалады (сүйек резорбциясы көрсеткіштері үшін 7-күнге қарай және сүйек қалыптасуының көрсеткіштері үшін 12-аптада). Нәтижесінде, сүйек алмасуының көрсеткіштері менопауза алдындағы мәндерінің шектерінде тұрақтанады. Жыл сайын қайталанатын дозаларында сүйек тінінің метаболизмі маркерлерінің үдемелі азаюы байқалмады. Клиникалық тиімділігі мен қауіпсіздігі Остеопорозды емдеудің клиникалық тиімділігі (СБЗ) 3 жыл қатарынан жылына бір рет 5 мг золедрон қышқылының тиімділігі мен қауіпсіздігі менопаузадан кейінгі кезеңдегі, ортан жілік мойны сүйегінің минералдық тығыздығының (СМТ) T-көрсеткіші ≤ –1,5 және, омыртқаның кемінде екі жеңіл немесе бір орташа омыртқалық сынуы (сынулары) болған; немесе ортан жілік мойнының СМТ T-көрсеткіші ≤ –2,5 және омыртқалық сыну (сынулар) белгілері бар немесе ондай белгілерсіз әйелдерде (65–89 жас шамасындағы 7.736 әйел) көрсетілді. 85 % пациент әйел бұрын бисфосфонаттармен ем қабылдамаған. Омыртқалық сынулардың туындау жиілігі бойынша бағаланған әйелдер санның және барлық клиникалық сынулар бағаланған зерттеуге қатысқан әйелдерге рұқсат етілетін остеопорозға қарсы қатарлас емді қабылдамаған. Остеопороздың қатарлас емі мыналарды: кальцитонин, ралоксифен, тамоксифен, гормон алмастырушы емді, тиболонды қамтыды; бірақ басқа бисфосфонаттарды қамтымады. Әйелдердің барлығы элементарлы кальцийдің 1000-нан 1500 мг дейінгі дозаларын және D дәруменін тәулігіне 400-ден 1200 ХБ дейін қабылдаған. Омыртқаның морфометриялық сынуларына әсері Золедрон қышқылы үш жыл ішінде және емдеуден кейін бір жылдан соң омыртқаның бір немесе бірнеше жаңа сынуларының туындау жиілігін едәуір азайтты (2-кестені қараңыз). 2-кесте. 12, 24 және 36 айда омыртқалық сынуларға әсеріне қысқаша шолу Нәтиже — Золедрон қышқылы (%) — Плацебо (%) — Сынулардың туындау жиілігінің абсолюттік төмендеуі % (ДИ) — Сынулардың туындау жиілігінің салыстырмалы төмендеуі % (СА) Кемінде бір омыртқалық сыну (0-1 жыл) — 1,5 — 3,7 — 2,2 (1,4; 3,1) — 60 (43,72)** Кемінде бір омыртқалық сыну (0-2 жыл) — 2,2 — 7,7 — 5,5 (4,4; 6,6) — 71 (62,78)** Кемінде бір омыртқалық сыну (0-3 жыл) — 3,3 — 10,9 — 7,6 (6,3; 9,0) — 70 (62,76)** ** р < 0,0001 75 жас шамасындағы және одан үлкен, золедрон қышқылымен ем қабылдаған пациенттер, омыртқалық сынулар қаупінің плацебо қабылдаған пациенттермен салыстырғанда 60 %-ға азайғанын көрсетті (p <0,0001). Ортан жілік мойнының сынуларына әсері Золедрон қышқылы 3 жыл ішінде тиісінше әсерін танытып, ортан жілік мойнының сынулары қаупінің 41 %-ға азаюына алып келді (95 % СА, 17 %-дан 58 %-ға дейін). Ортан жілік мойны сынуының жиілігі плацебо қабылдаған пациенттер үшін 2,49 %-бен салыстырғанда, золедрон қышқылымен ем қабылдаған пациенттер үшін 1,44 % құрады. Қауіптің азаюы бұрын бисфосфонаттармен ем қабылдамаған пациенттерде 51 %, және остеопороздың қатарлас емін қабылдауға мүмкіндігі болған пациенттерде 42 % құрады. Барлық клиникалық сынуларға әсері Барлық клиникалық сынулар рентгенографиялық және/немесе клиникалық деректермен расталды. Нәтижелерінің қысқаша шолуы 3-кестеде берілген. 3-кесте. Салыстыру топтарында 3 жыл ішінде негізгі клиникалық сынулардың туындау жиілігі Нәтиже — Золедрон қышқылын қолданғандағы (N=3875) құбылыстардың жиілігі (%) — Плацебо қолданғандағы (N=3861) құбылыстардың жиілігі (%) — Сынулар құбылыстары жиілігінің абсолюттік төмендеуі % (СА) — Сынулардың туындау жиілігі төмендеуінің салыстырмалы қаупі % Кез келген клиникалық сыну (1) — 8,4 — 12,8 — 4,4 (3,0; 5,8) — 33 (23, 42)** Клиникалық омыртқалық сыну (2) — 0,5 — 2,6 — 2,1 (1,5; 2,7) — 77 (63, 86)** Омыртқалық емес сыну (1) — 8,0 — 10,7 — 2,7 (1,4; 4,0) — 25 (13; 36)* *p-мәні <0,001, **p-мәні <0,0001 Саусақтың, башпайдың және және беттің сынуларын қоспағанда Кеуде бөлігі мен бел-сегізкөз бөлігінің клиникалық омыртқалық сынуларын қоса Сүйектің минералдық тығыздығына (СМТ) әсері Золедрон қышқылы плацебомен салыстырғанда, омыртқаның бел-сегізкөз бөлігіндегі, ортан жілік буынындағы және білек сүйегінің дистальді бөлігінде СМТ барлық уақыт нүктелерінде (6, 12, 24 және 36 ай) едәуір арттырған. 3 жыл бойы золедрон қышқылымен емдеу плацебомен салыстырғанда, омыртқаның бел-сегізкөз бөлігіндегі СМТ 6,7 %-ға, ұршық буынындағы СМТ 6,0 %, ортан жілік мойнында 5,1 %-ға, білек сүйегінің дистальді бөлігінде 3,2 %-ға артуына алып келді. Сүйек гистологиясы Сүйектердің биопсиялары менопаузадан кейінгі кезеңдегі остеопорозы бар, золедрон қышқылымен ем (N=82) немесе плацебо (N=70) қабылдаған 152 пациент әйелде жыл сайынғы үшінші дозасынан кейін 1 жылдан соң мықын сүйегінің қырынан алынды. Гистоморфометриялық талдау сүйек тіні метаболизмінің 63 %-ға азайғанын көрсетті. Золедрон қышқылымен ем қабылдаған пациенттерде остеомаляция, сүйек кемігінің фиброзы немесе жетілмеген сүйек тінінің қалыптасуы анықталмады. Тетрациклиндік таңба золедрон қышқылын қолданған пациенттерден алынған 82 биопсияның біреуінен басқа барлығында анықталды. Компьютерлік микротомография талдауы (μКТ) плацебомен салыстырғанда, золедрон қышқылын қолданып ем қабылдаған пациенттерде сүйектің трабекулярлық заты көлемінің артқанын және сүйектің трабекулярлық заты құрылымының сақталғанын көрсетті. Сүйек тіні метаболизмінің маркерлері Сүйек-спецификалық сілтілік фосфатаза (сСФ), қан сарысуындағы коллагеннің I типті N-терминалдық пропептиді (P1NP) және сарысудағы бета-C-телопептидтер (b-CTx) қосалқы топтарда бүкіл зерттеу кезеңі бойына белгілі бір уақыт кезеңдерінде 517-ден 1246 пациентке дейінгі диапазонда бағаланды. Золедрон қышқылының жыл сайынғы 5 мг дозасымен емдеу сСФ деңгейін едәуір, 12 айда бастапқы деңгейіне қатысты 30 %-ға азайтты, ол 36 айда бастапқы деңгейлерінен 28 % төмен деңгейде сақталған. P1NP 12 айда бастапқы деңгейімен салыстырғанда едәуір, 61 %-ға төмендеді және 36 айда бастапқы деңгейлерінен 52 % төмен деңгейде сақталған. B-CTx 12 айда бастапқы деңгейлерінен едәуір, 61 %-ға төмендеген және 36 айда бастапқы деңгейлерінен 55% төмен деңгейде сақталған. Әр жылдың соңында бүкіл уақыт кезеңі бойына сүйек тіні метаболизмінің маркерлері менопаузаға дейінгі диапазон шегінде болды. Қайталама дозалары сүйек тінінің метаболизмі маркерлерінің әрі қарай азаюына алып келмеді. Өсуге әсері Остеопороз бойынша үш жылдық зерттеуде тұрған қалыптағы бой көрсеткіші бойды өлшегіштің көмегімен өлшенді. Золедрон қышқылын қолданған топта өсудің кемуі плацебо тобындағыға қарағанда шамамен 2,5 мм-ге аз болды, (95 % СА: 1,6 мм, 3,5 мм) [p <0,0001]. Еңбекке жарамсыз күндер Золедрон қышқылы арқаның ауыруымен байланысты белсенділігі шектеулі күндер мен төсек тартып жату режимі күндерінің орташа көрсеткішін едәуір, плацебомен салыстырғанда сәйкесінше 17,9 және 11,3 күнге азайтты, және сынулардың себебінен белсенділігі шектеулі күндер мен төсек тартып жату режимі күндерінің орташа көрсеткішін едәуір, плацебомен салыстырғанда сәйкесінше 2,9 күн мен 0,5 күнге азайтты (барлық p <0,01). Ортан жілік мойнының жуырдағы сынуынан кейін сыну қаупі жоғары пациенттерде остеопорозды емдеудегі клиникалық тиімділігі (ҚСЗ). Омыртқалық, омыртқалық емес және ортан жілік мойнының сынуларын қоса, клиникалық сынулардың туындау жиілігі 50-95 жас аралығындағы (орташа жас шамасы 74,5 жас), жуырда (90 күн ішінде) ортан жілік мойнының жарақаты аз сынуы болған 2127 ер мен әйелде бағаланды, олар зерттеудегі емнің (золедрон қышқылы) орташа алғанда 2 жылы бойына қадағаланды. Шамамен 42% пациент әйелде ортан жілік мойнының СМТ -2,5-тен аз Т-көрсеткіші анықталды және, шамамен 45% пациент әйелде ортан жілік мойнының СМТ -2,5-тен жоғары Т-көрсеткіші анықталды. Золедрон қышқылы жылына бір рет, халықтың зерттеудегі тобындағы кемінде 211 пациент әйелде клиникалық сынулар расталғанша қолданылған. D дәруменінің деңгейлері жүйелі түрде өлшенбеді, бірақ пациенттердің көпшілігіне инфузияға дейін 2 апта бұрын D дәруменінің екпінді дозасы (пероральді немесе бұлшықет ішіне 50.000-нан 125.000 ХБ дейін) енгізілген. Пациент әйелдердің барлығы 1000-нан 1500 мг дейінгі элементарлы кальций қоспасын плюс күніне 800-ден 1200 ХБ дейін D дәруменін қабылдады. Пациент әйелдердің тоқсан бес пайызы инфузияларды ортан жілік мойнының сынуын хирургиялық жолмен қалпына келтіруден кейін екі немесе одан көп апта сайын қабылдады, инфузияның орташа уақыты ортан жілік мойнының сынуынан кейін шамамен алты аптаны құрады. Тиімділігінің негізгі критерийі бүкіл зерттеу кезеңі бойына клиникалық сынулардың туындау жиілігі болды. Барлық клиникалық сынуларға әсері Негізгі клиникалық сынулардың туындау жиілігінің коэффициенті 4-кестеде берілген. 4-кесте Салыстыру топтарында негізгі клиникалық сынулардың туындау жиілігі Нәтиже — Золедрон қышқылын қолданғанда (N=1065) құбылыстардың жиілігі (%) — Плацебо (N=1062) қолданғанда құбылыстардың жиілігі (%) — Сынулар құбылыстары жиілігінің абсолюттік төмендеуі % (СА) — Сынулардың туындау жиілігінің азаюының салыстырмалы қаупі % (СА) Кез келген клиникалық сыну (1) — 8,6 — 13,9 — 5,3 (2,3;8,3) — 35 (16; 50)** Клиникалық омыртқалық сыну (2) — 1,7 — 3,8 — 2,1 (0,5; 3,7) — 46 (8; 68)** Омыртқалық емес сыну (1) — 7,6 — 10,7 — 3,1 (0,3; 5,9) — 27 (2; 45)* *p-мәні <0,05, **p-мәні <0,01 Саусақтардың, башпайлардың, беттің сынуларын қоспағанда Кеуде бөлігі мен бел-сегізкөз бөлігінің клиникалық омыртқалық сынуларын қоса Зерттеу ортан жілік мойны сынуларындағы елеулі айырмашылықтарды өлшеу үшін әзірленбеді, бірақ ортан жілік мойнының жаңа сынуларының азаюына қатысты үрдіс байқалды. Жалпы өлім көрсеткіші плацебо қолданан топтағы 13 %-бен (141 пациент) салыстырғанда золедрон қышқылымен ем қабылдаған топта 10 % (101 пациент) құрады. Бұл жалпы өлім қаупінің 28% төмендеуіне сәйкес келеді (p=0,01). Ортан жілік мойны сынығының кеш жазылуы туындауының жиілігі золедрон қышқылы (34 [3,2%]) мен плацебоны қолданған кезде салыстырымды (29 [2,7%]) болды. Сүйектің минералдық тығыздығына (СМТ) әсері HORIZON-СБЗ зерттеуінде барлық уақыт нүктелерінде золедрон қышқылымен емдеу плацебо қолданып емдеуге қатысты ұршық буыны мен ортан жілік мойнының СМТ едәуір арттырған. Золедрон қышқылымен емдеу плацебомен салыстырғанда, 24 ай ішінде ұршық буынының СМТ 5,4 %-ға және ортан жілік мойнының СМТ 4,3 %-ға артуына алып келген. Ерлердегі клиникалық тиімділігі HORIZON-СБЗ зерттеуіне 508 ер адам рандомизацияланды, СМТ бағалау 24 айда 185 пациентте жүргізілді. 24 айда ұршық буыны СМТ 3,6 %-ға ұқсас елеулі жоғарылауы HORIZON-СБЗ зерттеуінде менопаузадан кейінгі әйелдерде байқалған әсерімен салыстырғанда, золедрон қышқылымен ем қабылдаған пациенттерде байқалды. Зерттеу ерлердегі клиникалық сынулар жиілігінің азаюын көрсетуге бағытталмады; клиникалық сынулардың туындау жиілігі плацебо жағдайындағы 8,7%-бен салыстырғанда, золедрон қышқылымен ем қабылдаған ерлерде 7,5 % құрады. Ерлерде жүргізілген басқа бір зерттеуде (CZOL446M2308 зерттеуі) 24 айдан соң золедрон қышқылының жыл сайынғы инфузиялары омыртқаның бел-сегізкөз бөлігінің СМТ өзгеру пайызы жағынан, бастапқы деңгейімен салыстырғанда апта сайын қолданылатын алендронаттан кем түспеді. Глюкокортикостероидтарды қолданып ұзақ, жүйелі емдеумен байланысты остеопороз кезіндегі клиникалық тиімділігі Глюкокортикоидтарды қолданумен ұзақ, жүйелі емдеумен байланысты остеопорозды емдеу және профилактикасы кезінде Золедрон қышқылының клиникалық тиімділігі мен қауіпсіздігі күніне > 7,5 мг пероральді преднизолонмен (немесе баламасымен) ем қабылдаған, 18-85 жас аралығындағы (ерлер үшін орташа жас 56,4 жас; әйелдер үшін 53,5 жас) 833 ер мен әйелдің қатысуымен белсенді бақылаумен рандомизацияланған, көп орталықты, салыстырмалы-жасырын, стратификацияланған зерттеуде бағаланды. Рандомизацияға дейін пациенттер глюкокортикоидтарды қолдану ұзақтығына қатысты стратификацияланған (> 3 аймен салыстырғанда ≤ 3 ай). Зерттеу ұзақтығы бір жылды құраған. Пациенттер золедрон қышқылының бір реттік 5 мг инфузиясын, не тәулігіне 5 мг пероральді ризедронатты бір жыл бойы қолданатын топтарға рандомизацияланған. Қатысушылардың барлығы 1000 мг элементарлы кальций қоспасын плюс күніне 400-ден1000 ХБ D дәруменін қабылдады. Егер бел-сегізкөз бөлігінің СМТ деңгейі емдеу топтарында да, профилактика топтарында да бастапқы деңгейіне қатысты ризедронатқа қарағанда төмен болмаса, золедрон қышқылының тиімділігі 12 айдан соң оң бағаланды. Пациенттердің көпшілігі глюкокортикоидтарды қабылдауды зерттеу кезеңінің бір жылы бойына жалғастырды. Сүйектің минералдық тығыздығына (СМТ) әсері 12 айдан соң бел-сегізкөз бөлігі мен ортан жілік мойнындағы СМТ жоғарылауы ризедронатпен салыстырғанда, золедрон қышқылымен ем қабылдаған топта едәуір көп болды (барлық p <0,03). Пациенттердің рандомизацияға дейін 3 айдан артық мерзім ішінде глюкокортикоидтарды қабылдаған қосалқы тобында, золедрон қышқылы бел-сегізкөз бөлігіндегі СМТ ризедронат үшін 2,71%-бен салыстырғанда 4,06%-ға арттырды (орташа айырмашылығы: 1,36 %; p <0,001). Пациенттердің рандомизацияға дейін 3 ай немесе одан аз уақыт бойы глюкокортикоидтарды қабылдаған қосалқы тобында, ризедронат тобындағы 0,64 %-бен салыстырғанда золедрон қышқылы бел-сегізкөз бөлігіндегі СМТ 2,60 %-ға арттырды (орташа айырмашылығы: 1,96 %; p <0,001). Зерттеу ризедронатпен салыстырғанда, клиникалық сынулар жиілігінің азайғанын көрсетуге бағытталмады. Сынулардың туындау жиілігі ризедронатпен ем қабылдаған пациенттер үшін 7-мен салыстырғанда, золедрон қышқылымен қабылдаған пациенттер үшін 8 құрады (p=0,8055). Педжеттің сүйек ауыруын емдеу кезіндегі клиникалық тиімділігі Золедрон қышқылы 30 жастан асқан, көбінесе Педжет ауруының рентгенографиялық деректермен расталған жеңіл және орташа түрі бар ер және әйел пациенттерде зерттелді (қан сарысуындағы сілтілік фосфатазаның орташа деңгейі зерттеу сәтіндегі жас шамасының жоғарғы қалып шегінен 2,6–3,0 есе артық болды). 2 ай бойы ризедронаттың 30 мг күнделікті дозаларымен салыстырғанда, 5 мг золедрон қышқылының бір инфузиясының тиімділігі 6 айлық екі салыстыру зерттеуінде көрсетілді. 6 айдан соң золедрон қышқылы ризедронат тобындағы 74% (127/171) және 58 %-бен (99/171) салыстырғанда, емге 96 % (169/176) және 89 % (156/176) жауап және сарысудағы сілтілік фосфатазаның (СФС) қалыпқа келу коэффициенттерін көрсетті (барлық p <0,001). Біріктірілген нәтижелерде бастапқы деңгейімен салыстырғанда аурудың және ауырсыну бұзылыстарының айқындығы көрсеткіштерінің ұқсас төмендеуі золедрон қышқылы мен ризедронат үшін 6 айдан соң байқалды. 6 айдан соң емге жауап берген және іріктеу критерийлеріне сәйкес келген пациенттер қадағалау кезеңі ұзағырақ топқа қосылды. Золедрон қышқылын қабылдаған 153 пациент, және ризедронатты қабылдаған 115 пациент дозасы енгізілген сәттен бастап орташа ұзақтығы 3,8 жылға созылған кеңейтілген зерттеуге енгізілді. Қайта емдеу қажеттілігіне (клиникалық тұжырым) байланысты, қадағалаудың кеңейтілген кезеңін аяқтап шыққан пациенттердің үлесі золедрон қышқылын қабылдаған топпен (11 пациент, немесе 7,2%) салыстырғанда, ризедронат тобы үшін жоғары (48 пациент, немесе 41,7%) болды. Педжет ауруын қайта емдеу қажеттілігіне байланысты қадағалаудың кеңейтілген кезеңінің аяқталуының орташа уақыты ризедронатты қабылдаған топқа (5,1 жыл) қарағанда золедрон қышқылымен емделген топ үшін көп болды (7,7 жыл). Золедрон қышқылымен емдеуден кейін 6 айдан соң емдік жауапқа қол жеткізген алты пациент, кейінірек ұзақ уақыт қадағалау кезеңінің ішінде аурудың қайталануын бастан өткерді және орташа алғанда бастапқы емнен кейін 6,5 жылдан соң золедрон қышқылымен қайтадан ем қабылдады. 6 пациенттің 5-еуінде СФС деңгейі қалып шегінде болды 6-ншы айда (соңғы қадағалау деректерін тасымалдау әдісі, СҚДТ). Сүйектердің гистологиялық зерттеуі Педжет ауруы бар 7 пациентте 5 мг золедрон қышқылымен емдеуден кейін 6 айдан соң бағаланды. Сүйек биопсиясының нәтижелері сүйек тінінің қайта модельденуінің нашарлауы белгілерінің болуынсыз, сүйек сапасының қалыптылығын және минералдануында ақау белгілерінің жоқтығын көрсетті. Бұл нәтижелер сүйек тіні метаболизмінің қалыпқа келуін көрсететін биохимиялық маркермен салыстырымды болды. Балалар Рандомизацияланған салыстырмалы жасырын плацебо-бақыланатын зерттеу 5 жастан 17 жасқа дейінгі, глюкокортикостероидтарды қабылдаған және сүйектің минералдық тығыздығының төмендеуі (омыртқаның бел-сегізкөз бөлігіндегі СМТ Z-көрсеткіші -0,5 немесе төмен) және энергетикасы төмен /жарақаты аз сыну диагнозы қойылған балалардың қатысуымен жүргізілді. Осы зерттеуге рандомизацияланған пациенттер популяциясы (ITT-популяция), ревматоидтық аурулардың бірнеше қосалқы типі, ішектің қабыну ауруы немесе Дюшеннің бұлшықет дистрофиясы бар балаларды қамтыды. Зерттеуге 92 пациентті қатыстыру жоспарланған, алайда, оған тек 34 пациент рандомизацияланған, оларға бір жыл ішінде жылына екі рет не золедрон қышқылы венаішілік инфузия түрінде 0,05 мг/кг дозада (ең көбі 5 мг), немесе плацебо енгізілген. Пациенттердің барлығы негізгі ем ретінде D дәрумені мен кальцийді қабылдауға тиіс болды. Золедрон қышқылының инфузиялары омыртқаның бел-сегізкөз бөлігінде СМТ Z-көрсеткішнің жоғарылауына алып келген: 12 айдан соң плацебо тобымен салыстырғанда, бастапқы деңгейіне қатысты ең кіші квадраттар әдісімен алынған орташа мәндердің айырмашылығы 0,41 құрады (95 %-дық СА: 0,02, 0,81; сәйкесінше 18 және 16 пациент). 6 ай емдеуден соң бел-сегізкөз бөлігінде СМТ Z-көрсеткішінің өзгерісі анықталмады. 12 айдан соң плацебо тобымен салыстырғанда, золедрон қышқылын қолданған топта сүйектің қайта модельденуінің үш маркері (P1NP, BSAP, NTX) деңгейінің статистикалық тұрғыдан елеулі (p <0,05) төмендеуі тіркелді. Золедрон қышқылын қолданған топ пен плацебо тобындағы пациенттерде 6 және 12 айдан соң организмнің сүйек тіндерінің минералдануының жалпы деңгейінде статистикалық тұрғыдан елеулі айырмашылықтар байқалмады. Қаңқасы өсіп келе жатқан балаларда СМТ өзгерісі мен сынаулардың алдын алу арасында байланыстың айқын дәлелдері жоқ. Золедрон қышқылын қолданған топта омыртқа сынуларының жаңа жағдайлары анықталмады, ал плацебо тобында ондай екі жағдай тіркелді. Золедрон қышқылының инфузиясынан кейін анағұрлым көп таралған жағымсыз реакциялар: артралгия (28 %), қызба (22 %), құсу (22 %), бас ауыруы (22 %), жүрек айнуы (17 %), миалгия (17 %), ауыру (17 %), диарея (11 %) және гипокальциемия (11 %). Күрделі жағымсыз құбылыстар плацебо тобындағыға қарағанда, золедрон қышқылын қолданған топтағы көптеген пациентте тіркелді (5 [27,8 %] пациент және 1 [6,3 %] пациент). Жоғарыда аталған негізгі зерттеудің 12 айлық ашық жалғасында жаңа клиникалық сынулар байқалмады. Алайда, 2 пациентте, әр емдеу тобында бір-бірден (золедрон қышқылын қабылдаған топта: 1/9, 11,1 % және плацебо қабылдаған топта: 1/14, 7,1 %), омыртқалардың жаңа морфометриялық сынулары болды. Қауіпсіздігі жөніндегі жаңа деректер болмады. Еуропаның дәрілік заттар агенттігі золедрон қышқылын Педжет ауруы, менопаузадан кейінгі кезеңдегі сынулар қаупі жоғары әйелдердегі остеопороз, сынулар қаупі жоғары ерлердегі остеопороз кезінде және ерлер мен әйелдердегі ортан жілік сынуынан кейінгі клиникалық сынулардың профилактикасы кезінде балалардың барлық қосалқы топтарында зерттеулердің нәтижелерін беру міндеттемесінен бас тартты (педиатрияда қолданылуы жөнінде ақпарат алу үшін 4.2 бөлімін қараңыз).

Дозалау режимі Дозалау Остеолекс препаратын қолданар алдында пациенттер тиісті гидратациямен қамтамасыз етілуі тиіс. Бұл егде жастағы (≥65 жас) пациенттер үшін және диурездік дәрілерді қолданып ем қабылдап жүрген пациенттер үшін аса маңызды. Остеолекс препаратын қолданумен байланысты кальцийді және D дәруменін талапқа сай пайдалану ұсынылады. Остеопороз Постменопауза кезеңіндегі остеопорозды, еркектердегі остеопорозды және глюкокортикостероидтармен ұзақ уақыт жүйелі емдеумен байланысты остеопорозды емдеу үшін, Остеолекс препаратының ұсынылатын дозасы вена ішіне бір реттік инфузия түріндегі жылына бір рет қолданылатын 5 мг құрайды. Остеопорозда бисфосфонаттармен емдеудің оңтайлы ұзақтығы анықталған жоқ. Остеолекс препаратын қолданғанда, әсіресе 5 және одан көбірек жыл қолданудан кейін, пайда/қаупі арақатынасына қарай, ұзақ емдеу қажеттілігіне әрбір пациент үшін мезгіл-мезгіл жекелей баға берілуі тиіс. Ортан жілік сүйегінің проксимальді бөлімінің сынғанына көп уақыт бола қоймаған пациенттерге Остеолекс препаратының инфузиясын операциядан кейін ең кемінде екі аптадан соң тағайындау ұсынылады. Ортан жілік сүйегінің проксимальді бөлімінің сынғанына көп уақыт бола қоймаған пациенттерге Остеолекс препаратының алғашқы инфузиясына дейін D дәруменін 50 000-нан 125 000 ХБ дейінгі дозада пероральді түрде немесе бұлшықет ішіне қабылдау ұсынылады. Педжет ауруы Педжет ауруын емдегенде Остеолекс препаратын сүйектің Педжет ауруын емдеу тәжірибесі бар дәрігерлер ғана тағайындауы тиіс. Ұсынылатын доза вена ішіне бір реттік инфузия түрінде 5 мг. Педжет ауруы бар пациенттерге Остеолекс препаратын енгізгеннен кейін, ең әрі дегенде 10 күн бойы күніне екі рет кемінде 500 мг элементарлы кальцийге сәйкес талапқа сай кальций дозасын қолдану табанды түрде ұсынылады. Ересектерде Педжет ауруын қайталап емдеу Педжет ауруын Остеолекс препаратымен емдеуден кейін емдеуге жауап беретін пациенттерде ремиссияның ұзақ кезеңі байқалады. Қайталап емдеу, аурудың қайталануы байқалған пациенттерді емдеуді бастаған сәттен бастап бір жыл немесе одан көбірек аралықпен Остеолекс препаратының 5 мг дозасымен вена ішіне қосымша инфузия жүргізуді қамтиды. Педжет ауруын қайталап емдеу жөнінде деректер шектеулі. Халықтың ерекше топтары Бүйрек функциясы бұзылған пациенттер Остеолекс препаратын креатинин клиренсі <35 мл/мин пациенттерге қолдануға болмайды. Креатинин клиренсі ≥ 35 мл/мин пациенттерде дозаны түзетудің қажеті болмайды. Бауыр функциясы бұзылған пациенттер Дозаны түзету қажет емес. Егде жастағы пациенттер (≥ 65 жас) Дозаны түзету қажет емес, өйткені егде жастағы пациенттерде және жасырақ пациенттерде биожетімділігінің, таралуының және шығарылуының сипаты ұқсас болады. Балалар және жасөспірімдер Остеолекс препараты балалар мен 18 жасқа толмаған жасөспірімдерде қолданылмауы тиіс. Препараттың 5 жасқа толмаған балаларда қолданылуы жөнінде деректер жоқ. Препараттың 5 жастан 17 жасқа дейінгі балаларда қолданылуы жөніндегі қазіргі сәтте қолжетімді деректер бар. Енгізу әдісі және жолы Вена ішіне. Остеолекс препараты клапандық инфузиялық жүйе арқылы енгізіледі және тұрақты енгізу жылдамдығымен баяу құйылады. Инфузия уақыты кем дегенде 15 минутты құрауы тиіс. Егер ерітінді салқындау болса, ерітіндінің температурасы бөлме температурасына жеткенше күте тұру қажет. Вена ішіне инфузияға арналған ерітіндіні дайындау кезінде асептика ережелерін сақтау қажет. Препарат тек бір рет қолданылады. Инфузия аяқталғаннан кейін пайдаланылмаған ерітіндіні утилизациялау керек. Остеолекс препаратымен ем қабылдап жүрген пациенттерге дәрілік затты қолдану жөніндегі нұсқаулық және пациентке арналған жадынама берілуі тиіс. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар В/і енгізуге арналған. Препаратты тек маман ғана енгізуі тиіс. Препаратты артерия ішіне енгізуден немесе айналасындағы тіндерге тигізуден аулақ болған жөн.

• препараттың кез келген компоненттеріне және басқа бисфосфанаттарға жоғары сезімталдық • гипокальциемия • бүйрек функциясының ауыр бұзылуы (креатинин клиренсі <35 мл/мин) • жүктілік және бала емізу кезеңі

Өте жиі • қызба Жиі • гипокальциемия* • бас ауыруы, бас айналуы • көз гиперемиясы • жүрекшелердің фибрилляциясы • жүректің айнуы, құсу, диарея • миалгия, артралгия, сүйектердің ауыруы, арқаның ауыруы, аяқ-қолдардың ауыруы • тұмау тәрізді синдром, қалтырау, қатты қажу, астения, ауыру, жалпы дімкәстану, препаратты енгізген орындағы реакция • С-реактивті ақуыздың жоғарылау Жиі емес • тұмау, назофарингит • анемия • тәбеттің төмендеуі • ұйқысыздық • летаргия, парестезия, ұйқышылдық, тремор, естен тану, дисгевзия • конъюнктивит, көздің ауыруы • вертиго • жүрек соғуының сезілуі • гипертония, ысыну • жөтел, ентігу • диспепсия, іштің жоғарғы бөлігінің ауыруы, іш ауыруы, гастроэзофагеальді рефлюкс, іш қату, ауыздың құрғауы, эзофагит, тіс ауыруы, гастрит# • бөртпе, гипергидроз, қышыну, эритема • мойын аймағының ауыруы, сүйек-бұлшықет сіресуі, буындар аймағының ісінуі, бұлшықет түйілуі, кеудедегі бұлшықет-қаңқа ауыруы, буындардың сіресуі, артриттер, бұлшықет әлсіздігі • қандағы креатинин деңгейінің жоғарылауы, поллакиурия, протеинурия • шеткері ісіну, шөлдеу, жедел фазадағы реакция, кеуденің кардиальді емес ауыруы • қандағы кальций деңгейінің төмендеуі Сирек • гипофосфатемия • увеит, эписклерит, ирит • ұршықбас арқылы және ортан жіліктің диафиздік атиптіқ сынулары† (бисфосфонаттар класының жағымсыз құбылысы) Өте сирек сыртқы есту жолының остеонекрозы (бисфосфонаттар класының жағымсыз құбылысы) Белгісіз** (бар деректер негізінде бағалау мүмкін емес) • бронх түйілуінің, есекжем мен ангионевроздық ісінудің сирек жағдайларын және анафилаксиялық реакцияның/шоктың өте сирек жағдайларын қоса, аса жоғары сезімталдық реакциялары • склерит және парофтальм • гипотония (кейбір пациенттерде қатарлас қауіп факторлары болған) • жақсүйек остеонекрозы (класс-спецификалық әсер) • бүйрек функциясының бұзылуы. Диализді қажет ететін бүйрек жеткіліксіздігінің сирек жағдайлары және өліммен аяқталған сирек жағдайлары бұрын бүйрек функциясының бұзылуы немесе жас егделігі, нефроуытты дәрілік заттарды қатарлас қолдану, диурездік дәрілерді қолданып қатарлас емдеу немесе инфузиядан кейінгі кезеңде сусыздану сияқты басқа қауіп факторлары болған пациенттерде байқалған (класс-спецификалық әсер). • в бүйректің қабынуы( тубулоинтерстициальды нефрит): белгілері мен белгілеріне зәр көлемінің төмендеуі, зәрдегі қан, жүрек айну, жалпы әлсіздік кіруі мүмкін • жедел фазадағы реакцияларға қатысты салдарлы сусыздану (гипертермия, құсу және диарея сияқты қабылдаудан кейінгі симптомдар). #- глюкокортикостероидтарды бір мезгілде қабылдаған пациенттерде байқалды. *- тек Педжет ауруы кезінде ғана жиі. ** - постмаркетингтік кезеңдегі хабарламалар негізінде. Көбінесе қолда бар деректер бойынша бағалау мүмкін емес. † - постмаркетингтік тәжірибеде анықталған. Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз: Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Жедел артық дозалануының клиникалық тәжірибесі шектеулі. Ұсынылғанынан жоғары дозаларын қабылдаған пациенттерді мұқият бақылау қажет. Симптомдары: гипокальциемия Емі: кальций препараттарын пероральді және/немесе кальций глюконатын вена ішіне инфузия түрінде.

Остеолекс препаратын қолданудан кейін алғашқы үш күн ішінде пайда болатын симптомдардың туындау жиілігі Остеолекс препаратын қолданудан кейін парацетамолды немесе ибупрофенді қолданғанда төмендеуі мүмкін. Остеолекс препаратының құрамында бар әсер етуші зат (золедрон қышқылы), онкологиялық ауруларды емдеуге арналған Зомета® препаратының да құрамында бар, сондықтан Зомета® препаратымен емделіп жүрген пациенттерге Остеолекс препаратын тағайындамайды. Арнайы ескертулер Бүйрек функциясының бұзылуы Остеолекс препаратын бүйрек функциясының ауыр бұзылуы бар (креатинин клиренсі <35 мл/мин) бар пациенттерге, бүйрек жеткіліксіздігінің даму қаупі жоғарылайтындықтан, қолдануға болмайды. Бүйрек жеткіліксіздігі, әсіресе егде жасты қоса алғанда, бұрын болған бүйрек дисфункциясы немесе басқа да қауіптері бар пациенттерде, қатар жүретін нефроуытты дәрілік заттар, қатарлас диурездік ем немесе Остеолексті қолданғаннан кейін пайда болатын дегидратацияны қоса алғанда, байқалады. Бүйрек жеткіліксіздігі пациенттерде бір рет енгізгеннен кейін байқалады. Диализді талап ететін немесе өліммен аяқталатын бүйрек жеткіліксіздігі, жоғарыда сипатталған кез келген қауіп факторлары немесе бүйрек жеткіліксіздігі бар пациенттерде сирек пайда болды. Бүйрек тарапынан жағымсыз реакциялардың даму қаупін азайту үшін мыналарды ескеру қажет: • креатинин клиренсін Остеолекс препаратының әрбір дозасын қабылдар алдында нақты дене салмағына сүйене отырып, Кокрофт-Голт формуласы бойынша есептеу керек; • қан сарысуында креатинин деңгейінің өтпелі артуы бүйрек функциясының бұзылуы бар пациенттерде елеулірек болуы мүмкін; • қауіп тобындағы пациенттерде қан сарысуындағы креатинин деңгейіне мониторинг жүргізу ұсынылады; • егер бүйрек функциясына ықпалын тигізетін басқа препараттар бір мезгілде пайдаланылса, препаратты сақтықпен қолдану керек • Остеолекс препаратын қолданар алдында пациенттер, әсіресе егде жастағы пациенттер және диуретикалық дәрілерді қабылдап жүрген пациенттер тиісті гидратациямен қамтамасыз етілуі тиіс; • препараттың бір реттік дозасы 5 мг-ден аспауы тиіс және инфузия ұзақтығы ең кемінде 15 минут болуы тиіс Гипокальциемия Гипокальциемия бар болған жағдайда Остеолекс препаратын қолдануды бастар алдында кальцийдің және D дәруменінің талапқа сай дозаларымен ем жүргізу қажет. Сондай-ақ басқа да бұрыннан бар минералды алмасудың бұзылуларына (мысалы, гипопаратиреоз немесе кальцийдің ішекте сіңуінің төмендеуі) ем жүргізу және гипокальциемиясы бар пациенттердің ұдайы бақылануын қамтамасыз ету керек. Сүйектің Педжет ауруы сүйек тінінің алмасу белсенділігінің жоғарылауымен сипатталады. Остеолекс препаратын қолданудан кейін сүйектік алмасуға қатысты әсердің тез басталуы салдарынан инфузиядан кейін алғашқы 10 күн ішінде өтпелі гипокальциемия дамуы мүмкін Остеолекс препаратын қолданумен байланысты кальцийді және D дәруменін талапқа сай пайдалану ұсынылады. Бұдан басқа, Педжет ауруы бар пациенттерге препаратты енгізгеннен кейін, ең әрі дегенде 10 күн бойы күніне екі рет ең кемінде 500 мг элементарлы кальцийге сәйкес кальций дозасын тағайындау табанды түрде ұсынылады. Пациенттер гипокальциемия симптомдары туралы хабардар болуы және қауіп кезеңінде оларға тиісінше клиникалық мониторинг жасалуы тиіс. Педжет ауруы бар пациенттерде Остеолекс препаратымен инфузия жүргізу алдында сарысудағы кальций деңгейін өлшеу ұсынылады. Золедрон қышқылын қоса, бисфосфонаттарды қабылдап жүрген пациенттердің сүйектерінде, буындарында және/немесе бұлшықеттерінде сирек жағдайларда ауыр және мезгіл-мезгіл еңбекке қабілеттілігінің жоғалуына әкелетін ауырудың туындағаны туралы мәлімделді Жақсүйек остеонекрозы (ЖОН) Маркетингтен кейінгі кезеңде остеопорозды емдеу үшін Остеолекс препаратын (золедрон қышқылын) қабылдаған пациенттерде ЖОН туралы мәлімделді. Емді бастауды немесе емдеудің жаңа курсын ауыз қуысының жұмсақ тіндерінде жазылмаған ашық жаралары бар науқастарда кейінге қалдыру керек. Тісті профилактикалық тексеру және қатар жүретін қауіп факторлары бар пациенттерде Остеолекс препаратымен ем жүргізу алдында пайда/қаупі арақатынасына жекелей баға беру ұсынылады. Пациенттерде жақ остеонекрозының даму қаупіне баға берген кезде келесі факторларды ескеру қажет: • сүйек резорбциясын тежейтін дәрілік заттың әлеуетін (күшті әсер ететін препараттар үшін қауіп жоғарырақ), енгізу жолын (парентералдық енгізу кезінде қауіп жоғарырақ) және сүйек-резорбциялық емнің жиынтық дозасын; • обырды, қатар жүретін патологиялық жағдайларды (мысалы, анемия, коагулопатиялар, инфекциялар), шылым шегу; • қатар жүргізілетін ем: кортикостероидтар, химиялық ем, ангиогенез тежегіштері, бас пен мойынды сәулелік емдеу; • ауыз қуысының тазалығын сақтамау, пародонтоздар, нашар бекітілген протездер, ауыз қуысының бұдан бұрынғы аурулары, инвазиялық стоматологиялық емшаралар, мысалы, тісті жұлу. Барлық пациенттер ауыз қуысының тазалығын сақтауы, стоматологтың тексеруінен өтуі және ауыз қуысындағы, мысалы, тістің босап қозғалуы, ауыруы немесе ісінуі, золедрон қышқылымен емдеу кезінде ойық жаралардың жазылмауы сияқты туындаған кез келген өзгерістер туралы дереу мәлімдеп отыруы тиіс. Емдеу кезінде стоматологиялық емшаралар сақтықпен жасалуы тиіс және оларға золедрон қышқылымен емдеуді бастауға жақын кезеңде жол бермеу керек. Жақ остеонекрозы дамыған пациенттерде ем жүргізу жоспары емдеуді дәрігермен және стоматологпен немесе жақ остеонекрозымен жұмыс істеу тәжірибесі бар жақ-бет хирургімен ықтымақтаса отырып жүргізілуі тиіс. Егер жағдай жақсармаса және қауіп факторлары азаймаса ғана золедрон қышқылымен емдеуді уақытша тоқтатуды қарастыру қажет. Сыртқы есту жолының остеонекрозы Бисфосфонаттарды қолданғанда, негізінен ұзақ емдеген кезде сыртқы есту жолының остеонекрозы туралы мәлімделді. Сыртқы есту жолының остеонекрозы дамуының ықтимал қауіп факторлары глюкокортикостероидтық препараттарды қолдану, химиялық ем және/немесе жергілікті инфекция немесе жарақат сияқты қауіп факторлары болып табылады. Құлақтың созылмалы инфекциясы симптомдары бар, бисфосфонаттар қабылдап жүрген пациенттерде сыртқы есту жолында остеонекроздың дамуы мүмкін екендігін есте ұстау қажет. Ортан жіліктің атиптік сынулары Бисфосфонаттармен емдеу аясында, негізінен, остеопорозға қатысты ұзақ ем қабылдаған пациенттерде атиптік ұршықастылық және ортан жіліктің диафиздік сынулары туралы мәлімделді. Көлденең немесе қысқа қиғаш сынулар ортан жілік сүйегінің ұзына бойы, кіші ұршықтан төмен жерден бастап айдаршық үстінің көтеріңкі жеріне дейін кез келген жерде туындауы мүмкін. Мұндай сынулар болымсыз жарақаттан кейін немесе тіпті онсыз да туындайды, ал кейбір пациенттерде стрестік сынудың рентгенологиялық белгілерімен қатар жүретін ауыру ортан жілік сүйегінің толық сынуынан апта немесе ай бұрын пайда болады. Көбіне сынулар екі жақты болып табылады; сондықтан бисфосфонаттармен ем қабылдап жүрген және ортан жілік сүйегінің диафиздік сынуы айғақталған пациенттерде сонымен қатар басқа ортан жілікті де тексеру қажет. Мұндай сынулардың нашар жазылуы туралы мәлімдемелер бар. Ортан жіліктің атиптік сынуларына күдіктері бар пациенттерде қаупі мен пайдасының арақатынасына жекелей баға беру негізінде Остеолекс препаратымен емдеуді тоқтатуды қарастыру керек. Остеолекс препаратымен емдеу кезінде пациенттерге ортан жіліктегі, ұршық буынындағы немесе шап аймағындағы кез келген ауыру туралы мәлімдеп отыруға кеңес берген жөн, мұндай симптомдары бар барлық пациенттерде ортан жілік сүйегінің ықтимал сынуларының бар-жоғын тексеру керек. Жедел фазалық реакциялар Жедел фазалық реакциялар немесе қызба, миалгия, тұмау тәрізді симптомдар, артралгия және бас ауыруы сияқты дозадан кейінгі симптомдар байқалады, олардың көбісі енгізгеннен кейін үш күн ішінде жүреді. Жедел фазалық реакциялар кейде күрделі немесе ұзақ болуы мүмкін. Симптомдардың жиілігі дозаны енгізгеннен кейін парацетамолды немесе ибупрофенді енгізгенде Остеолексті енгізгеннен кейін көп ұзамай төмендеуі мүмкін. Сондай-ақ, егер пациент денсаулығының ауыр жағдайына байланысты клиникалық тұрғыдан тұрақсыз болса және жедел фазалық реакцияда қиындықтар болуы ықтимал болса, емдеуді кейінге қалдыру ұсынылады Жалпы Белсенді зат ретінде золедрон қышқылы бар басқа препараттар онкологиялық көрсеткіштер үшін қол жетімді. Остеолекспен емделетін пациенттерді осындай өнімдермен немесе кез келген басқа бисфосфонатпен бір мезгілде емдеуге болмайды, себебі бұл агенттердің біріктірілген әсерлері белгісіз. Бұл дәрілік препараттың құрамында 100 мл-ге 1 ммольден (23 мг) аз натрий бар, яғни, шын мәнінде «натрийсіз» болады.

Фертильділік Золедрон қышқылы егеуқұйрықтарда енелерінің және F1 ұрпақтарының фертильділігіне ықтимал жағымсыз әсерлеріне қатысты бағаланды. Бұл қаңқадағы кальций мобилизациясы қосылысының тежелуімен байланысты ұлғайған фармакологиялық әсерлеріне алып келген, ол перипартуарлық гипокальциемияға, бисфосфонаттар класының әсеріне, дистоцияға алып келеді. Осылайша, Остеолекстің адамдарда фертильділікке қорытынды әсері анықталмаған. Жүктілік Жүктілік кезінде Остеолекс препаратын қолдануға болмайды. Жүкті әйелдерге золедрон қышқылын қолдану туралы деректер жоқ. Адам үшін әлеуетті қаупі белгісіз. Жануарларда золедрон қышқылын қолданып жүргізілген зерттеулер, туа біткен ақауларды қоса, тұқым өрбіту функциясына уытты әсерінің болатынын көрсетті. Лактация Бала емізу кезеңінде әйелдерге Остеолекс препаратын қолдануға болмайды. Адамның емшек сүтімен золедрон қышқылының шығарылатыны-шығарылмайтыны белгісіз. Бала туатын жастағы әйелдер Остеолекс препараты бала туатын жастағы әйелдерге қолдануға ұсынылмайды. Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері Бас айналу сияқты жағымсыз реакциялар көлік құралын немесе механизмдерді басқару қабілетіне ықпалын тигізуі мүмкін.

Басқа препараттармен өзара әрекеттесулерін зерттеулер жүргізілмеді. Золедрон қышқылы адамда Р450 цитохромының энзимдеріне ықпалын тигізбейді, плазма ақуыздарымен елеусіз дәрежеде (шамамен 43-55%) байланысады, сондықтан өзара әрекеттесуі екіталай. Золедрон қышқылы организмнен бүйректік экскреция жолымен шығарылады. Остеолексті бүйрек функциясына елеулі ықпалын тигізетін препараттармен (мысалы, аминогликозидтер немесе диуретиктер, олар дегидратацияны туындатуы мүмкін) біріктіріп қолданғанда сақтық таныту керек. Бүйрек функциясы бұзылған пациенттерде көбінесе бүйрек арқылы шығарылатын, қатар қолданылатын медициналық препараттардың жүйелі әсері артуы мүмкін.

Сақтау мерзімі 3 жыл Жарамдылық мерзімі өткеннен кейін қолдануға болмайды! Сақтау шарттары 25 ºС-ден аспайтын температурада сақтау керек. Балалардың қолы жетпейтін жерде сақтау керек!