Кейвер® Саше гранулы 25 мг

Бір сашенің ішінде: белсенді зат – 36,90 мг декскетопрофен трометамолы, бұл 25 мг декскетопрофенге баламалы, қосымша заттар: сахароза, аммоний глицирризаты, неогесперидин дигидрохалконы, сусыз коллоидты кремнийдің қостотығы, «Лимон» хош иістендіргіші. Сыртқы түрінің, иісінің, дәмінің сипаттамасы Лимон иісімен ақ немесе ақ дерлік түсті сусымалы түйіршіктелген ұнтақ.

Қарқындылығы жеңіл немесе орташа болатын жедел ауырсынуды қысқа мерзімді симптоматикалық емдеу, мәселен: - қаңқа-бұлшықет ауыруы - дисменорея - тіс ауыру

Декскетопрофен трометамолы пропион қышқылының трометаминдік тұзы (S)-(+)-2-(3-бензоилфенил) түрінде болады. Бұл қабынуға қарсы стероидты емес препараттар (ҚҚСП) тобына жататын аналгезиялық, қабынуға қарсы, қызу түсіретін дәрілік зат. Әсер ету механизмі ҚҚСП әсері циклооксигеназа белсенділігінің бәсеңдеуі есебінен простагландиндер синтезінің азаюынан тұрады. Атап айтқанда, ҚҚСП арахидон қышқылының PGE1, PGE2, PGF2α, PGD2 және PGI2 простагландиндері (простациклин) түзілетін PGG2 және PGH2 циклдық эндопероксидтерге және TxA2 мен TxB2 тромбоксандарына айналуын тежейді. Бұдан бөлек, простагландиндер синтезінің бәсеңдеуі, болжамды түрде, тікелей әсеріне қосымша болатын жанама әсерін туғыза отырып, басқа қабыну медиаторларына, мысалы, кининдерге ықпал етеді. Фармакодинамикалық әсері Декскетопрофеннің циклооксигеназа-1 және циклооксигеназа-2 белсенділігін тежеу әсері жануарлар мен адамдарда көріністелді. Клиникалық тиімділігі және қауіпсіздігі Клиникалық зерттеулер декскетопрофеннің ауыруды басатын тиімді әсерін тигізетінін көрсетті, ол препаратты қолданудан кейін 30 минут өткен соң дамиды және 4-6 сағатқа созылады.

Дозалау режимі Препараттың жағымсыз әсерлерін симптомдарды жою үшін қажет болатын ең қысқа уақыт кезеңі ішінде ұсынылатын ең төмен дозаларын қолдану арқылы барынша азайтуға болады. Ересектер Ауыру түріне және қарқынына қарай ұсынылатын доза әр 8 сағат сайын 25 мг (1 пакет) құрайды. Тәуліктік доза 75 мг-ден аспауы тиіс. Кейвер® Саше препараты тек қысқа мерзімде қолдануға арналған; емдеу симптомдары болатын кезеңмен шектелуі тиіс. Пациенттердің ерекше топтары Егде жастағы пациенттер Емдеуді ең төмен дозаларынан (тәуліктік доза 50 мг) бастау ұсынылады. Препараттың жағымдылығы жақсы болса, дозаны дағдылы мөлшерге дейін арттыруға болады. Бауыр жеткіліксіздігі бар пациенттер Бауыр функциясының ауырлығы жеңіл және орташа дәрежедегі бұзылуларында емдеуді ең төмен дозаларынан (тәуліктік доза 50 мг) және дәрігердің қатаң қадағалауымен бастау керек. Препаратты бауыр жеткіліксіздігі ауыр пациенттерде пайдалануға болмайды. Бүйрек жеткіліксіздігі бар пациенттер Бастапқы дозаны бүйрек функциясының әлсіз бұзылуы бар (креатинин клиренсі 60-89 мл/мин) пациенттерде 50 мг жалпы тәуліктік дозасына дейін төмендету керек. Бүйрек функциясының орташа немесе ауыр бұзылуы бар пациенттерде (креатинин клиренсі ≤ 59 мл/мин) Кейвер® Саше препаратын пайдалануға болмайды. Балалар Балалар мен жасөспірімдерде декскетопрофен қауіпсіздігі мен тиімділігі анықталмаған. Осыған байланысты, пациенттердің аталған тобында препаратты пайдалануға болмайды. Енгізу әдісі және жолы Ішке қабылдауға арналған. Бір пакеттің ішіндегісін түгел бір стақан суда ерітіңіз, әбден еріп кету үшін жақсылап шайқаңыз/араластырыңыз. Бұл ерітіндіні дайындалған соң бірден қабылдау керек. Ас ішумен бірге қабылдау препараттың сіңуін баяулатады, сондықтан жедел ауыруларда препаратты тамақтанудан, кем дегенде, 15 минут бұрын қабылдау ұсынылады. Дәрілік препаратты қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар Осы препаратты қолдануға қатысты қандай да бір қосымша сұрақтар туындаса, емдеуші дәрігерден кеңес алу керек.

• әсер етуші затқа, кез келген басқа ҚҚСП немесе қосымша заттардың кез келгеніне аса жоғары сезімталдығы бар пациенттер • ұқсас әсер ететін заттар (мысалы, ацетилсалицил қышқылы және басқа ҚҚСП) демікпе, бронх түйілуі, жедел ринит ұстамаларының дамуына түрткі болатын немесе мұрын полиптерінің дамуын, есекжемнің немесе ангионевроздық ісінудің пайда болуын тудыратын пациенттер • кетопрофенмен немесе фибраттармен емдеу кезінде фотоаллергиялық немесе фотоуытты реакцияларының белгілі дамуы бар пациенттер • анамнезінде алдыңғы ҚҚСП емімен байланысты асқазан-ішек қан кетуі немесе ойылуы (тесілуі) болған пациенттер • белсенді пептидтік ойық жарасы/асқазан-ішектен қан кетуі бар немесе анамнезінде асқазан-ішектен қан кету, ойық жаралану немесе тесілу болған пациенттер • созылмалы диспепсия бар пациенттер • белсенді фазадағы қан кетуі немесе жоғары қанағыштыққа бейімділігі бар пациенттер • Крон ауруы, спецификалық емес ойық жаралы колит бар пациенттер • жүрек жеткіліксіздігі ауыр пациенттер • бүйрек функциясының орташа немесе ауыр дәрежедегі бұзылуы (креатинин клиренсі ≤ 59 мл/мин) бар пациенттер • бауыр функциясының ауыр бұзылуы (Чайлд-Пью шкаласы бойынша 10-15 балл) бар пациенттер • геморрагиялық диатез және қан ұюының басқа бұзылулары бар пациенттер • айқын дегидратация (құсу, диарея немесе сұйықтықты жеткіліксіз ішу нәтижесіндегі) бар пациенттер • жүктіліктің үшінші триместрі және бала емізу кезеңі • балалар және 18 жасқа дейінгі жасөспірімдер

Клиникалық сынақтар деректері бойынша декскетопрофенмен (дәрілік түрі – таблеткалар) байланысы, кем дегенде, болуы мүмкін деп танылған жағымсыз реакциялар, сондай-ақ хабарламалары Кейвер® Саше препаратының нарыққа шығарылуынан кейін алынған жағымсыз әсерлер. Жиі: - жүрек айну, құсу, іштің ауыруы, диарея, диспепсия Жиі емес: - ұйқысыздық, мазасыздық - бас ауыру, бас айналу, ұйқышылдық - вертиго - пальпитация - қан кернеу - гастрит, іш қату, ауыз кеберсуі, метеоризм - бөртпе - шаршау, ауыру, астения, қалтырау, дімкәстану Сирек: - көмей ісінуі - анорексия - парестезия, естен тану - гипертензия - брадипноэ - пептидтік ойық жара, пептидтік ойық жарадан қан кету немесе оның тесілуі - гепатоцеллюлярлы зақымдану - есекжем, безеулі бөртпе, қатты тершеңдік - арқаның ауыруы - бүйректің жедел жеткіліксіздігі, полиурия - етеккір бұзылыстары, қуық асты безінің бұзылыстары - шеткері ісінулер - қалыптан тыс бауыр сынамалары Өте сирек: - нейтропения, тромбоцитопения - анафилаксиялық реакциялар, анафилаксиялық шокты қоса - анық көрмеу - құлақтағы шуыл - тахикардия - гипотензия - бронх түйілуі, ентігу - панкреатит - Стивенс-Джонсон синдромы, уытты эпидермалық некролиз (Лайелл синдромы), ангионевроздық ісіну, беттің ісінуі, фотосезімталдық реакциялары, қышыну - нефрит немесе нефроздық синдром Ас қорыту жолы тарапынан жағымсыз реакциялар бәрінен жиірек байқалады. Осылайша, ас қорыту жолында пептидтік ойық жараның, тесілуінің немесе қан кетуінің дамуы кейде өліммен аяқталуымен, әсіресе, егде жастағы тұлғаларда болуы мүмкін. Қолда бар деректер бойынша препаратты қолдану аясында жүрек айну, құсу, диарея, метеоризм, іш қату, диспепсия, іштің ауыруы, мелена, қан аралас құсу, ойық жаралы стоматит, колит өршуі, Крон ауруы пайда болуы мүмкін. Сирегірек гастрит білінеді. ҚҚСП қолдану аясында ісінулер, гипертензия мен жүрек жеткіліксіздігі де болуы мүмкін. Басқа ҚҚСП қолдану жағдайындағы сияқты, ең алдымен, жүйелі қызыл жегі немесе дәнекер тіннің аралас аурулары, әрі гематологиялық реакциялар (пурпура, аплазиялық және гемолиздік анемия, сирек – агранулоцитоз және сүйек кемігінің гипоплазиясы) бар пациенттерде туындайтын асептикалық менингит дамуы мүмкін. Буллезді реакциялар, оның ішінде Стивенс-Джонсон синдромы және уытты эпидермалық некролиз (өте сирек) болуы мүмкін. Клиникалық зерттеулер және эпидемиологиялық деректер нәтижелеріне сай, әсіресе, жоғары дозаларда және ұзақ уақыт бойы кейбір ҚҚСП қолдану артериялар тромбозы туғызған патологияның (мысалы, миокард инфарктісі немесе инсульт) даму қаупінің сәл артуымен қатар жүруі мүмкін. Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша тікелей ақпараттық дерекқорға хабарласу керек Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Артық дозалану кезіндегі симптоматикасы белгісіз. Осыған ұқсас дәрілік заттар асқазан-ішек жолы (құсу, тәбет жоғалту, іштің ауыруы) және жүйке жүйесі (ұйқышылдық, бас айналу, бағдардан жаңылу, бас ауыру) тарапынан бұзылуларды тудырды. Кездейсоқ артық дозаланғанда, пациенттің клиникалық ахуалына сай, симптоматикалық емді дереу бастау керек. Егер ересек пациент немесе бала 1 сағат ішінде дене салмағына > 5 мг/кг доза қабылдаса, белсендірілген көмір қабылдау керек. Декскетопрофен трометамолын шығару үшін гемодиализді пайдалануға болады.

Кейвер® Саше анамнезінде аллергиялық реакциялар бар пациенттерде сақтықпен қолданылады. Препаратты басқа ҚҚСП, оның ішінде ЦОГ-2 селективті тежегіштерімен бір мезгілде қолданбаған дұрыс. Препараттың жағымсыз әсерлерін симптомдарды бақылау үшін қажетті мүмкіндігінше ең қысқа кезең ішінде ең төмен дозаларда қолдану арқылы барынша азайтуға болады. Арнайы сақтандырулар Асқазан-ішек жолына қатысты қауіпсіздігі Барлық ҚҚСП қолдану кезінде емдеу барысындағы кез келген сәтте анамнезінде күрделі асқазан-ішек құбылыстарының сақтандыру симптомдары мен көрсетілімдері болғанда немесе болмағанда өліммен аяқталуы мүмкін асқазан-ішек қан кетуі, ойық жарасы немесе тесілуі байқалды. Анамнезінде, әсіресе, қан кетумен немесе тесілумен асқынған ойық жарасы бар пациенттерде және егде жастағы адамдарда ҚҚСП дозаларын арттыру кезінде асқазан-ішектен қан кетуі, ойық жарасы немесе тесілуінің туындау қаупі артады. Егде жастағы пациенттерде ҚҚСП қолайсыз реакцияларының, әсіресе, өліммен аяқталуы мүмкін асқазан-ішектен қан кетуі мен тесілуінің туындау жиілігі артады. Осындай пациенттерді емдеу мүмкін болатын ең төмен дозадан басталу керек. Барлық ҚҚСП жағдайындағы сияқты, декскетопрофен трометамолымен емдеуді бастар алдында олардың толық жазылғанына көз жеткізу үшін эзофагит, гастрит және/немесе пептидтік ойық жара туралы кез келген көрсетілімдер тұрғысынан анамнезді зерттеу қажет. Асқазан-ішек жолы тарапынан симптомдары немесе асқазан-ішек жолының созылмалы аурулары бар пациенттер ас қорыту бұзылуларын, әсіресе, асқазан-ішектен қан кетуін бақылап отыру керек. Анамнезінде асқазан-ішек жолының аурулары (ойық жаралы колит, Крон ауруы) бар пациенттер, олардың жай-күйі өршіп кетуі мүмкін екендіктен, ҚҚСП сақтықпен қабылдау керек. Осындай пациенттерге асқазан-ішек жолына қорғау әсерін көрсететін препараттармен (мизопростол, протонды помпа тежегіштері) біріктірілген ем тағайындауға болады. Бұл ацетилсалицил қышқылын төмен дозаларда немесе асқазан-ішек жолы тарапынан асқынудың даму қаупін арттыратын басқа дәрілерді біріктіріп қолдануды қажет ететін пациенттерге де қатысты. Анамнезінде асқазан-ішек жолының уыттануы бар, әсіресе, егде жастағы пациенттер, әсіресе, емдеудің бастапқы сатыларында кез келген дағдыдан тыс абдоминальді симптомдар (әсіресе, асқазан-ішектен қан кетулер) туралы хабарлауы тиіс. Ішуге арналған кортикостероидтар, варфарин сияқты антикоагулянттар, серотонинді кері қармайтын селективті тежегіштер немесе ацетилсалицил қышқылы сияқты антитромбоцитарлық препараттар тәрізді ойық жаралану немесе қан кету қаупін арттыруы мүмкін қатарлас препараттарды қабылдап жүрген пациенттерде сақ болу керек. Бүйрекке қатысты қолдану қауіпсіздігі Бүйрек функциясының бұзылуы бар пациенттерге препаратты сақтықпен тағайындау керек, өйткені осындай пациенттерде ҚҚСП қолдану бүйрек функциясының нашарлауын, организмде сұйықтық іркілісін және ісінудің пайда болуын тудыруы мүмкін. Кейвер® Саше, нефроуыттылықтың жоғары даму қаупі болатындықтан, диуретиктер қабылдап жүрген пациенттерге және гиповолемияның даму қаупі бар пациенттерге сақтықпен тағайындалады. Емдеу кезінде сусыздануды және онымен байланысты болуы мүмкін жоғары нефроуыттылықты болдырмау үшін талапқа сай сұйықтық ішу қамтамасыз етілуі тиіс. Декскетопрофен, басқа да ҚҚСП сияқты, қан плазмасында мочевина азоты мен креатинин деңгейін арттыруы мүмкін. Простагландиндер синтезінің басқа тежегіштері сияқты, декскетопрофен қолдану гломерулонефрит, интерстициальді нефрит, папиллярлық некроз, нефроздық синдром және бүйректің жедел жеткіліксіздігіне әкелуі мүмкін бүйрек тарапынан жағымсыз реакциялармен қатар жүруі мүмкін. Егде жастағы тұлғалар өздерінде бүйрек функциясы бұзылуының дамуына бейімдеу. Бауырға қатысты қолдану қауіпсіздігі Кейвер® Саше бауыр функциясының бұзылуы бар пациенттерге сақтықпен тағайындалу керек. Декскетопрофен бауырдың кейбір параметрлерінің қысқа мерзімді мардымсыз артуын, сондай-ақ AсАT және AлАT едәуір жоғарылауын тудыруы мүмкін. Аталған көрсеткіштер тиісті жоғарылаған жағдайда емдеу тоқтатылуы тиіс. Егде жастағы тұлғалар өздерінде бауыр функциясы бұзылуының дамуына бейімірек. Жүрек-қантамыр жүйесіне және ми қан айналымына қатысты қолдану қауіпсіздігі Гипертензия және/немесе анамнезінде жеңілден орташа дәрежеге дейінгі жүрек жеткіліксіздігі бар пациенттер үшін тиісті мониторинг қажет. Жүрек жеткіліксіздігінің жоғары туындау қаупі болатындықтан, әрі ҚҚСП емімен байланысты сұйықтық іркілісі және ісінулер туралы хабарланғандықтан, препарат анамнезінде жүрек аурулары бар, әсіресе, жүрек жеткіліксіздігінің көріністері болған пациенттерге тағайындалғанда ерекше сақ болу талап етіледі. Клиникалық зерттеулер және эпидемиологиялық деректер кейбір ҚҚСП қолданудың (әсіресе, жоғары дозаларда және ұзақ уақыт бойы емдегенде) артериялық тромбоз асқынулары (мысалы, миокард инфарктісі немесе инсульт) қаупінің сәл артуымен байланысты болуы мүмкін екенін айғақтайды. Декскетопрофенге тән осындай қауіпті жоққа шығару үшін жеткілікті ақпарат жоқ. Бақыланбайтын гипертензия, іркілісті жүрек жеткіліксіздігі, жүректің ишемиялық ауруы, шеткері артериялар зақымдануы және/немесе цереброваскулярлық бұзылулары бар пациенттерге декскетопрофен пайда және қауіп арақатынасын мұқият бағалаудан кейін ғана тағайындалады. Дәл сол қағида бойынша гиперлипидемия, гипертензия, қант диабеті сияқты жүрек-қантамыр ауруларының қауіп факторлары бар пациенттерде және егер пациент шылым шеккен жағдайда декскетопрофенмен ұзақ мерзімді ем тағайындаудың мақсатқа сай болуы бағаланады. Барлық селективті емес ҚҚСП тромбоциттер агрегациясын тежеуі мүмкін және простагландиндер синтезін тежеу арқылы қан кету уақытын ұзарта алады. Осылайша, варфарин немесе басқа кумариндер немесе гепариндер сияқты гемостазға әсер ететін препараттармен ем алып жүрген пациенттерде декскетопрофен қолдану ұсынылмайды. Егде жастағы тұлғалар өздерінде жүрек-қантамырлық жүйе функциясы бұзылуының дамуына бейімдеу. Тері реакциялары ҚҚСП қолданумен байланысты эксфолиативті дерматит, Стивенс-Джонсон синдромын және уытты эпидермалық некролизді қоса, тері реакциялары (кейбірі өліммен аяқталатын) туралы өте сирек хабарланды. Бәрінен жиірек жағымсыз реакциялар емдеудің басында; көптеген жағдайларда – емдеудің алғашқы айында дамиды. Тері бөртпесінің алғашқы көріністерінде, шырышты қабық зақымдануында немесе аса жоғары сезімталдықтың басқа көріністерінде Кейвер® Саше дереу тоқтатылу керек. Негізгі инфекциялар симптомдарының бүркемеленуі Декскетопрофен тиісті емнің кідіріспен басталуына алып келуі ықтимал инфекция симптомдарын бүркемелеуі және сол арқылы инфекция нәтижесін нашарлатуы мүмкін. Бұл ауруханадан тыс бактериялық пневмония және желшешектің бактериялық асқынулары кезінде байқалды. Препарат инфекциямен байланысты ауырсынуды жеңілдету үшін қолданылғанда инфекция ағымын мониторингтеуге кеңес беріледі. Стационармен байланысты емес жағдайларда, егер симптомдар сақталатын немесе нашарлайтын болса, пациент дәрігерге қаралуы тиіс. Қосымша ақпарат Препаратты келесі пациенттерге тағайындалғанда ерекше сақтану шаралары қажет болады: - порфирин метаболизмінің туа біткен бұзылуымен (мысалы, жедел ұстамалы порфирия); - сусызданумен; - тікелей ауқымды операциялық араласулардан кейін. Ұзақ мерзімді ем қажет болса, қан көрінісіне, бауыр және бүйрек функциясына бақылау жүргізілуі тиіс. Өте сирек жағдайларда аса жоғары сезімталдықтың ауыр жедел реакциялары (мысалы, анафилаксиялық шок) байқалды. Декскетопрофен қабылдаудан кейін аса жоғары сезімталдықтың ауыр реакцияларының алғашқы белгілерінде емдеу тоқтатылуы тиіс. Симптомдарына қарай медициналық емшаралардың бәрін дәрігер-мамандар жүргізуі тиіс. Созылмалы ринит, созылмалы синусит және/немесе мұрын полиптерімен біріккен демікпеден зардап шегіп жүрген пациенттерде ҚҚСП және/немесе ацетилсалицил қышқылына аллергияның өте жоғары даму қаупі бар. Декскетопрофен қабылдау, әсіресе, ҚҚСП немесе ацетилсалицил қышқылына аллергиясы бар пациенттерде демікпе ұстамаларын немесе бронх түйілуін тудыруы мүмкін. Айрықша жағдайларда желшешек тері және жұмсақ тіндер инфекцияларының күрделі асқынуларына себеп болуы мүмкін. Қазіргі уақытта осы атап көрсетілген инфекциялар ағымының нашарлауында ҚҚСП рөлін жоққа шығаруға болмайды. Сол себепті желшешек жағдайында Кейвер® Саше препаратын қолданбауға кеңес беріледі. Кейвер® Саше гемопоэз бұзылулары, жүйелі қызыл жегі немесе дәнекер тіннің аралас аурулары бар пациенттерге сақтықпен тағайындалу керек. Қосымша заттар Бұл препарат құрамында сахароза бар. Кейбір қанттардың жақпаушылығы анықталғанда осы дәрілік затты қабылдамас бұрын дәрігермен кеңесу қажет. Ұзақ уақыт қолданғанда (екі немесе одан көп апта) тістерге зиянды әсер етеді. Балаларда қолдану Балалар мен жасөспірімдерде қолдану қауіпсіздігі анықталмаған. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Кейвер® Саше препаратын қабылдау кезінде бас айналу, көру қабілетінің бұзылуы немесе ұйқышылдық сияқты жағымсыз әсерлер пайда болуы мүмкін, сондықтан ол ұйқышылдық пен бас айналудың пайда болу мүмкіндігіне орай, реакцияға және көлік құралдарын басқару және механизмдер қызметін көрсету қабілетіне әлсіз немесе орташа ықпалын тигізеді.

Жүктілік Простагландиндер синтезінің бәсеңдеуі жүктілікке және/немесе эмбрион мен шарананың дамуына жағымсыз әсер етуі мүмкін. Эпидемиологиялық бақылау нәтижелеріне сәйкес, жүктіліктің ерте мерзімдерінде простагландин синтезін бәсеңдететін препараттарды қолдану түсік тастау, шаранада жүрек ақауы және құрсақтың алдыңғы жақтауының бітпей қалу қаупін арттырады. Сонымен, жүрек-қантамыр жүйесі аномалияларының абсолютті даму қаупі < 1%-дан шамамен 1,5% дейін артты. Қауіп дозаны және қолдану ұзақтығын арттырумен жоғарылайды деп саналады. Жүктіліктің 20-шы аптасынан бастап декскетопрофенді қолдану шарананың бүйрек функциясының бұзылуы нәтижесінде олигогидрамниозды тудыруы мүмкін. Бұл емдеу басталған соң тез арада болуы мүмкін, бірақ оны тоқтатудан кейін олигогидрамниоз, әдетте, кері дамуға ұшырайды. Бұдан бөлек, жүктіліктің екінші триместрінде қабылданған емдеуден кейін артериялық түтіктің тарылуы туралы хабарламалар бар, бірақ емдеуді тоқтатудан кейін көптеген жағдайларда қалыпқа оралуы орын алды. Демек, жүктіліктің бірінші және екінші триместрінде декскетопрофенді тағайындау оның тегеурінді қажеттілігі болғанда ғана жүзеге асуы тиіс. Жүктілікті жоспарлайтын әйелдерге немесе жүктіліктің бірінші және екінші триместріне декскетопрофен тағайындалғанда ең қысқа емдеу ұзақтығымен мүмкін болатын ең аз дозаны таңдау керек. Жүктіліктің 20-шы аптасынан бастап, бірнеше күн бойы декскетопрофенді қабылдаудан кейін олигогидрамниоз және артериялық түтіктің тарылуы тұрғысынан антенатальді мониторинг өткізу керек. Декскетопрофенді олигогидрамниоз немесе артериялық түтіктің тарылуы анықталғанда тоқтату керек. Жүктіліктің үшінші триместрінде простагландиндер синтезінің тежегіштерін қолдану аясында шаранада келесі ауытқулар болуы мүмкін: - жүрек-өкпе уыттылығының көріністері (артериялық түтіктің мерзімінен бұрын тарылуы/жабылуы және өкпе артериясы жүйесіндегі гипертензия); - бүйрек дисфункциясы. Жүктіліктің соңында анасы мен жаңа туған нәрестеде келесі құбылыстар болуы мүмкін: - қан кету уақытының ұзаруы – тромбоциттер агрегациясын тежеу әсері, тіпті препаратты өте төмен дозаларда қолдану кезінде де болуы мүмкін; - босану әрекетінің кідірісіне немесе ұзаққа созылуына әкелетін жатырдың жиырылу белсенділігінің бәсеңдеуі. Бала емізу Декскетопрофеннің ана сүтіне өтуі туралы деректер жоқ. Кейвер® Саше лактация кезеңінде қолдануға қарсы көрсетілімді.

Ұсынылмайтын біріктірілімдер Басқа ҚҚСП (циклооксигеназа-2 селективті тежегіштерін қоса) және салицилаттар жоғары дозаларда (≥ 3 г/тәулік): синергиялық әсері есебінен асқазан-ішек жолынан қан кету және ойық жаралардың туындау қаупі артады. Антикоагулянттар: ҚҚСП декскетопрофеннің плазма ақуыздарымен жоғары деңгейде байланысуына, тромбоциттер функциясының тежелуіне және гастродуоденальді шырышты қабық зақымдануына байланысты варфарин сияқты антикоагулянттар әсерін күшейтуі мүмкін. Егер осындай біріктірілімді қолданбау мүмкін болмаса, зертханалық көрсеткіштердің тиісті бақылануымен пациенттің жай-күйін мұқият бақылау қажет. Гепариндер: қан кету қаупі артады (тромбоциттер функциясының тежелуімен және гастродуоденальді шырышты қабық зақымдануымен байланысты). Егер ондай біріктірілімді қолданбау мүмкін болмаса, зертханалық көрсеткіштердің тиісті бақылануымен пациенттің жай-күйін мұқият бақылау қажет. Кортикостероидтар: асқазан-ішек жолында ойық жаралар мен қан кетудің туындау қаупі артады. Литий: ҚҚСП қандағы литий деңгейін арттырады, ол бүйрекпен бөлінісінің азаюы есебінен уытты мәндерге жетуі мүмкін. Қандағы литий деңгейін декскетопрофенмен емнің басында, дозасын түзеткенде немесе онымен емдеуді тоқтатқанда бақылап отыру қажет. Метотрексат жоғары дозаларда (аптасына 15 мг және одан жоғары): метотрексаттың гематологиялық уыттылығы ҚҚСП қолдану аясында оның бүйректік клиренсінің азаюы есебінен артады. Гидантоиндер және сульфонамидтер: осы заттардың уытты қасиеттері күшеюі мүмкін. Қолдану кезінде сақтануды талап ететін біріктірілімдер Диуретиктер, ангиотензин өзгертуші фермент (АӨФ) тежегіштері, аминогликозидтер тобының антибиотиктері және ангиотензин II рецепторларының антагонистері: декскетопрофен диуретиктер мен гипертензияға қарсы басқа дәрілердің әсерін әлсіретуі мүмкін. Бүйрек функциясының бұзылуы бар кейбір пациенттерде (мысалы, сусыздануда немесе бүйрек функциясының бұзылуы бар егде жастағы тұлғаларда) ЦОГ әсерін бәсеңдететін дәрілерді АӨФ тежегіштерімен, ангиотензин ІІ рецепторларының антагонистерімен және аминогликозидтер тобының антибиотиктерімен бір мезгілде қолдану кезінде олардың жай-күйі нашарлауы мүмкін. Осылай нашарлауы, әдетте, қайтымды сипатта болады. Декскетопрофенді кез келген диурездік дәрімен бір мезгілде қолданғанда пациенттің талапқа сай гидратацияланғанына сенімді болу және емдеудің басында бүйрек функциясына бақылау жүргізу қажет. Метотрексат төмен дозаларда (аптасына 15 мг-ден аз): метотрексаттың гематологиялық уыттылығының ҚҚСП қолдану аясында оның бүйрек клиренсінің төмендеуіне байланысты артуы. Ем жүргізілген алғашқы апталар ішінде, әсіресе, бүйрек функциясының төмендеуі тіпті мардымсыз болса да, сондай-ақ егде жастағы тұлғаларда апта сайын қан көрінісін бақылау қажет. Пентоксифиллин: қан кету қаупі артады, клиникалық қадағалау және қан кету уақытын бақылау қажет. Зидовудин: ҚҚСП тағайындаудан кейін бір апта өткен соң ауыр анемия дамуымен ретикулоциттерге әсер ету себебінен болатын эритроциттерге уытты әсерінің жоғарылау қаупі. ҚҚСП емінің басталуынан кейін 1-2 аптадан соң қанның барлық жасушалық элементтерін, оның ішінде ретикулоциттерді бақылау қажет. Сульфонилмочевина: ҚҚСП сульфонилмочевинаның гипогликемиялық әсерін қан ақуыздарымен байланыстарынан ығыстыру есебінен күшейте алады. Ерекше зейін қоюды талап ететін біріктірілімдер β-блокаторлар: ҚҚСП емдеуі простагландиндер синтезін бәсеңдету есебінен олардың гипотензияға қарсы әсерін төмендетуі мүмкін. Циклоспорин және такролимус: ҚҚСП бүйрек простагландиндеріне әсер ету себебінен болатын нефроуыттылықты күшейтуі мүмкін. Біріктірілген ем жүргізу кезінде бүйрек функциясын бақылап отыру қажет. Тромболитиктер: қан кетудің даму қаупі артады. Тромбоциттер агрегациясының тежегіштері және серотонинді кері қармайтын селективті тежегіштер: асқазан-ішектен қан кетудің туындау қаупі артады. Пробенецид: плазмада декскетопрофен концентрациялары жоғарылауы мүмкін, ол өзекшелік секрецияның тежелу және глюкурон қышқылымен конъюгациялану себебінен болуы мүмкін. Бұл декскетопрофен дозасын түзетуді талап етеді. Жүрек гликозидтері: қан плазмасында олардың концентрациясы жоғарылауы мүмкін. Мифепристон: простагландин-синтетаза тежегіштері мифепристон тиімділігін өзгертуі мүмкін деген теориялық қауіп бар. Шектеулі деректер простагландиндерді қабылдаған күні бір мезгілде ҚҚСП қолданудың жатыр мойнының жетілуі немесе жиырылу қабілетіне қатысты мифепристон немесе простагландин әсерлеріне теріс ықпал етпейтінін және жүктілікті дәрі-дәрмекпен үзудің клиникалық тиімділігін төмендетпейтінін көрсетеді. Хинолонды антибиотиктер: жануарлардан алынған деректер жоғары дозаларда ҚҚСП-мен біріктірілімде қолдану құрысулардың даму қаупін арттыруы мүмкін екенін көрсетеді. Тенофовир: ҚҚСП-мен бір мезгілде қолдану қан плазмасындағы мочевина азоты мен креатинин деңгейлерін арттыруға қабілетті; бүйрек функциясына ықтималды синергиялық ықпалын бақылау үшін бүйрек функциясына мониторинг өткізу қажет. Деферазирокс: ҚҚСП-мен бір мезгілде қолдану асқазан-ішектің уыттану қаупін арттыруға қабілетті. Деферазирокс осы заттармен біріктірілімде қолданылғанда мұқият клиникалық мониторинг өткізуге кеңес беріледі. Пеметрексед: ҚҚСП-мен бір мезгілде қолдану пеметрексед шығарылуын төмендетуге қабілетті, сондықтан ҚҚСП жоғарырақ дозаларын қабылдағанда сақ болу керек. Бүйректің жеңіл немесе орташа жеткіліксіздігі бар пациенттерде (креатинин клиренсі 45-тен 79 мл/мин дейін) пеметрекседті қабылдауға дейін 2 күн және одан кейін 2 күн бойы пеметрекседті ҚҚСП дозаларымен бір мезгілде қолданбаған дұрыс.

Сақтау мерзімі 2 жыл. Жарамдылық мерзімі өткеннен кейін қолдануға болмайды. Сақтау шарттары 30 °С-ден аспайтын температурада сақтау керек. Балалардың қолы жетпейтін жерде сақтау керек.