Ацетилсалицил қышқылы таблетки 500 мг

Бір таблетканың құрамында: белсенді зат - 500 мг ацетилсалицил қышқылы, қосымша заттар: картоп крахмалы, повидон К-17 (төмен молекулалық поливинилпирролидон), лимон қышқылы моногидраты, тальк, кальций стеараты. Сыртқы түрінің, иісінің, дәмінің сипаттамасы Дөңгелек жалпақ цилиндр тәрізді иіссіз немесе өзіне тән әлсіз иісімен ойығы және сызығы бар ақ немесе ақ дерлік түсті таблеткалар. Таблетка бетінің мәрмәрлі болуына жол беріледі.

Ересектердегі әртүрлі шығу тегі орташа немесе жеңіл ауырсыну синдромымен симптоматикалық емдеу: бас ауыруы (оның ішінде алкогольді абстинентті синдромымен байланысты), тіс ауыруы, бас сақинасы, невралгия, түбіршектік синдром, бұлшықет және буын аурулары, алгоменорея (етеккір кезіндегі ауырсыну). Ересектер мен 16 жастан асқан балалардағы суық тию және басқа инфекциялық-қабыну аурулары бар қызба синдромы.

Әсер ету механизмі Фармакодинамикалық әсерлері Ацетилсалицил қышқылы - салицил қышқылының күрделі эфирі, қабынуға қарсы стероидты емес дәрілер тобына жатады. Әсер ету механизмі циклооксигеназа (ЦОГ-1) ферментінің қайтымсыз тежелуіне негізделген, нәтижесінде простагландиндер, простациклиндер және тромбоксан А2 синтезі бөгеледі. Оның анальгетикалық, ыстық түсіретін және қабынуға қарсы әсері бар. Клиникалық тиімділігі және қауіпсіздігі Жеке деректер жоқ. Қайта өндірілген препарат. Балалар Жеке деректер жоқ. Қайта өндірілген препарат.

Дозалау режимі Ішке, тамақтан кейін, көп мөлшердегі сұйықтықпен бірге. Препарат ересектер мен 16 жастан асқан балаларға арналған. Бір реттік доза - 500 мг, ең жоғары бір реттік доза - 1000 мг (500 мг-ден 2 таблетка), ең жоғары тәуліктік доза - 3000 мг (500 мг-ден 6 таблетка). Қажет болса, бір реттік дозаны күніне 3-4 рет, кем дегенде 4 сағат аралықпен қабылдауға болады. Дәрілік препаратты қолдану тәсілін түсіндіру үшін медициналық қызметкерден кеңес алу бойынша ұсыныстар Егер емдеуден кейін жақсару болмаса немесе симптомдар күшейсе, немесе жаңа белгілер пайда болса, пациент дәрігермен кеңесу керек. Препаратты қолдану тәсілі бойынша және нұсқаулықта көрсетілген дозада ғана қолданыңыз.

- ацетилсалицил қышқылына, басқа қабынуға қарсы стероидты емес препараттарға (ҚҚСП) және препараттың кез-келген қосымша заттарына жоғары сезімталдық; - асқазан-ішек жолдарының эрозиялық және ойықжаралы зақымдануы (асқыну кезеңінде), асқазан-ішектен қан кету; - геморрагиялық диатез (гемофилия, Виллебранд ауруы, телангиэктазия, гипопротромбинемия, тромбоцитопения, тромбоцитопениялық пурпура); - бронх демікпесінің толық немесе толық емес үйлесуі, мұрын мен мұрын маңындағы қуыстардың қайталамалы полипозының қосылуы және ацетилсалицил қышқылына және басқа да ҚҚСП-ге төзбеушілік (оның ішінде анамнезде); - глюкоза-6-фосфатдегидрогеназа тапшылығы; - жүктілік, емшек емізу кезеңі; - 16 жасқа дейінгі балалар; - бауырдың ауыр жеткіліксіздігі немесе белсенді бауыр ауруы; - ішектің қабыну ауруларының өршуі (ойық жаралы колит, Крон ауруы); - цереброваскулярлық қан кету немесе басқа қан кетулер; - К дәруменінің жетіспеушілігі; - метотрексатпен бір мезгілде 15 мг/аптадан артық дозада қабылдау; - тәулігіне 3 г асатын дозада пероральді антикоагулянттар мен ацетилсалицил қышқылын бір мезгілде енгізу; - ауыр бүйрек жеткіліксіздігі (креатинин клиренсі 30 мл/мин кем).

Жағымсыз реакциялардың жиілігін бағалау үшін ДДҰ келесі жіктемесі қолданылады: өте жиі (> 1/10); жиі (> 1/100 және <1/10); сирек (> 1/1000 және <1/100); сирек (> 1/10000 және <1/1000); өте сирек (<1/10000), жиілігі белгісіз - қолда бар деректер бойынша анықтау мүмкін емес. Асқазан-ішек жолдары тарапынан: жиі - жүрек айну, құсу, эпигастрий аймағында ауырсыну, тәбеттің төмендеуі; сирек - диарея, асқазан-ішектен қан кету («кофе ұнтағы» тәрізді құсу, қара «май тәрізді» нәжіс); өте сирек - «бауыр» трансаминазаларының белсенділігінің жоғарылауы, кейбір жағдайларда ойықжара, асқазанның перфорациясы. Жүйке жүйесі тарапынан: сирек - бас ауыруы, айналуы; кейбір жағдайларда - есту қабілетінің төмендеуі, құлақтағы шуыл. Қан жүйесі және лимфа жүйесі тарапынан: сирек - геморрагиялық синдром (мұрыннан қан кету, қызыл иектен қан кету, геморрагиялық бөртпе), қанның ұю уақыты жоғарылайды. Бұл әсерлер препарат тоқтатылған сәттен бастап 4-8 күн бойы сақталады және оларды пациенттерге келесі операцияларды жоспарлау кезінде ескеру қажет. Иммундық жүйе тарапынан: жиі - терінің бөртпесі; өте сирек – бронх түйілуі, Квинке ісінуі. «Аспирин» триадасының гаптендік механизмі негізінде қалыптастыру (бронх демікпесі, мұрын мен параназальды синусын қайталанатын полипозы және ацетилсалицил қышқылы мен пиразолон препараттарына төзбеушілік). Бауыр мен өт жолдары тарапынан: сирек - Рейе синдромы (энцефалопатия және бауыр жеткіліксіздігінің жедел дамуымен бауырдың майлы дегенерациясы). Жағымсыз дәрілік реакциялар туындаса медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарласыңыз Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Симптомдары (бір дозасы 150 мг/кг-нан аз - улану жеңіл деп саналады, 150-300 мг/кг - орташа, 300 мг/кг-нан жоғары - ауыр): салицилизм синдромы (ересектердегі болжанатын қиын белгілер - жүрек айну, құсу, құлақтың шуылы, көру қабілетінің нашарлауы, бас айналу, қатты бас ауыруы, жалпы дімкәстік, қызба). Ауыр улану - орталық генездегі өкпенің гипервентиляциясы, респираторлық алкалоз, метаболизмдік ацидоз, сананың шатасуы, ұйқышылдық, коллапс, құрысулар, анурия, қан кетулер. Бастапқыда өкпенің орталық гипервентиляциясы респираторлық алкалозға әкеледі - ентігу, тұншығу, цианоз, суық жабысқақ тер; уыттанудың күшеюімен тыныс алу салдануына және тотығу фосфорлануының ыдырауы күшейіп, респираторлық ацидоз тудырады. Созылмалы артық дозаланғанда плазмада анықталатын концентрация уыттанудың ауырлық дәрежесімен нашар корреляцияланады. Созылмалы уыттанудың дамуының ең үлкен қаупі егде жастағы адамдарда бірнеше күн бойы тәулігіне 100 мг/кг қабылдаған кезде байқалады. Балалар мен егде жастағы пациенттерде салицилизмнің алғашқы белгілері әрдайым байқала бермейді, сондықтан мезгіл-мезгіл қандағы салицилаттардың құрамын анықтаған жөн: 70 мг% -дан жоғары концентрация орташа және ауыр улануды көрсетеді; 100 мг% -дан жоғары - өте ауыр, болжамды жағынан қолайсыз. Орташа және ауыр улану үшін ауруханаға жатқызу қажет. Емі: құсуды қоздырумен, белсендірілген көмір мен іш жүргізетін дәрілерді тағайындау, қышқыл-негіздік күйін (ҚНК) және электролит теңгерімін үнемі бақылау; метаболизм жағдайына байланысты - натрий бикарбонатын, натрий цитратының ерітіндісін немесе натрий лактатын енгізу. Резервтік сілтіліктің жоғарылауы несептің сілтілену есебінен ацетилсалицил қышқылының шығарылуын күшейтеді. Несепті сілтілендіру салицилаттың 40 мг% -дан жоғары концентрациясында көрсетілген және натрий бикарбонатының венаішілік инфузиясымен қамтамасыз етіледі (1 л 5% декстроза ерітіндісінде 88 мэкв, 10-15 мл/сағ/кг жылдамдықпен); циркуляциялық қан көлемін қалпына келтіру және диурезді индукциялау натрий гидрокарбонатын бірдей дозада енгізу және сұйылту арқылы жүзеге асырылады, ол 2-3 рет қайталанады. Интенсивті сұйықтық құю өкпе ісінуіне әкелуі мүмкін егде жастағы науқастарға сақтық таныту керек. Ацетазоламидті несепді сілтілеу үшін қолдану ұсынылмайды (ол ацидоз тудыруы және салицилаттардың уытты әсерін күшейтуі мүмкін). Гемодиализ салицилат концентрациясы 100-130 мг%-дан жоғары, созылмалы улануымен ауыратын науқастарда - 40 мг% және одан төмен болса (отқа төзімді ацидоз, үдемелі нашарлау, орталық жүйке жүйесінің қатты зақымдануы, өкпе ісінуі және бүйрек жеткіліксіздігі). Өкпе ісінуінде - өкпені оттегімен байытылған қоспамен жасанды желдету.

Гиперурикемия, урат нефролитиазы, подагра, асқазанның ойық жарасы және / немесе он екі елі ішектің ойық жарасы немесе асқазан-ішектен қан кету (анамнезде), бүйрек жеткіліксіздігі (креатинин клиренсі 30-60 мл/мин-ден төмен), бауыр жеткіліксіздігі, бронх демікпесі, созылмалы респираторлық аурулар, мұрын полипозы, пішен қызбасы, дәрі-дәрмектік аллергия, антикоагулянттар мен ацетилсалицил қышқылын күніне 3 г-нан аз мөлшерде бір мезгілде енгізу, метотрексатты 15 мг/аптадан аз дозада бір мезгілде енгізу, метроррагия (жатырдан оралымнан тыс қан кету), гиперменорея (көп келетін және ұзаққа созылатын етеккір). Арнайы ескертулер Ацетилсалицил қышқылы бронх түйілуін, бронх демікпесінің ұстамасын немесе жоғары сезімталдықтың басқа реакцияларын туғызуы мүмкін. Бронх демікпесінің, мұрын полиптерінің, қызбаның, созылмалы бронх-өкпе ауруларының, анамнездегі аллергиялық жағдайлардың (аллергиялық риниттер, терідегі бөртулер) болуы қатерлі факторлар болып табылады. Ацетилсалицил қышқылы қансырауға бейімділікті арттыруы мүмкін, бұл оның тромбоциттер агрегациясын тежейтін әсеріне байланысты. Мұны хирургиялық араласулар, тіпті тіс жұлу сияқты шағын араласулар қажеттілігі туындағанда есепке алған дұрыс. Хирургиялық араласудың алдында операция барысындағы және операциядан кейінгі кезеңдегі қансырауды кеміту үшін препаратты қабылдауды 5-7 күн бұрын тоқтатып, бұл жөнінде дәрігерге ескерткен жөн. Несеп қышқылы тұздарының бөлінуі кемитіндіктен, бұл ауруларға бейім пациенттерде подаграның асқынуының себебіне айналуы ықтимал. Препаратты ұзақ уақыт қолданған кезде мезгіл-мезгіл жалпы қан талдауын және нәжісте жасырын қан талдауын өткізіп, бауырдың функционалдық жағдайын бақылау керек. Педиатрияда қолдану 16 жасқа дейінгі балаларға ацетилсалицил қышқылы бар препарат тағайындауға болмайды, өйткені вирустық инфекция кезінде Рейе синдромының даму қаупі (энцефалопатия және бауыр жеткіліксіздігінің жедел дамуымен бауырдың майлы дегенерациясы) жоғарылайды. Рейе синдромының симптомдары - ұзаққа созылған құсу, жедел энцефалопатия және бауырдың ұлғаюы. Препараттың көлік құралын немесе қауіптілігі зор механизмдерді басқару қабілетіне әсер ету ерекшеліктері Ем алу кезінде көлік құралдарын басқару және жоғары зейін қою мен психомоторлық реакциялардың шапшаңдығын талап ететін басқа да қауіптілігі зор қызмет түрлерімен шұғылданғанда мұқият болу керек.

Жүктілік Жүктілік кезінде ацетилсалицил қышқылы бар препараттарды қолдану қарсы көрсетілген. Лактация Салицилаттар және олардың метаболиттері аз мөлшерде емшек сүтіне өтеді. Лактация кезінде препаратты қабылдауға тыйым салынады.

Ацетилсалицил қышқылы метотрексаттың уыттылығын күшейтеді (оның бүйректік клиренсін төмендетеді), вальпрой қышқылы; есірткілік анальгетиктердің, басқа ҚҚСП-ның, ішуге арналған гипогликемиялық дәрілердің, гепариннің, тікелей емес антикоагулянттардың, тромболитиктер мен тромбоциттер агрегациясының тежегіштерінің, сульфаниламидтердің (ко-тримоксазолды қоса), трийодтирониннің әсерін күшейтеді; урикозуриялық дәрілердің (бензбромарон, сульфинпиразон), гипертензияға қарсы дәрілер мен диуретиктердің (спиронолактон, фуросемид) әсерін төмендетеді. Глюкокортикостероидтар, алкоголь және құрамында спирт бар препараттар АІЖ-ның шырышты қабығына зиянды әсерін күшейтеді, асқазан-ішектен қан кету қаупін арттырады. Ацетилсалицил қышқылы қан плазмасында дигоксин, барбитураттар және литий тұздарының концентрациясын жоғарылатады. Құрамында магний және/немесе алюминий гидроксиді бар антацидтер ацетилсалицил қышқылының бәсеңдеуін және сіңуін нашарлатады.

Сақтау мерзімі 4 жыл. Жарамдылық мерзімі өткеннен кейін қолдануға болмайды! Сақтау шарттары 25 °С-ден аспайтын температурада сақтау керек. Балалардың қолы жетпейтін жерде сақтау керек!